Ons kom vandag aan die einde van die Nederlandse Geloofsbelydenis. En oor 37 artikels het ons saam ons geloof bely. Ons glo! Ons glo. Ons glo. En vandag bely ons nog een keer saam: “Ons glo.” Ja, hierdie geloof wat ons bely het, vestig ons aandag op die einde, en ondersteun ons tot daardie einde, want dit laat ons oë opkyk en die hele lewe in die lig van die ewigheid sien. Hierdie lewe is maar net ’n asemteug. Hierdie lewe is slegs ’n mis wat vandag hier is en môre verdwyn. Ons lewe is soos die gras van die veld. Maar sy lewe is ewig. Die lewe van Christus is onverganklik en onsterflik. En dit is sy lewe wat ons lewe is. En dit is sy wederkoms wat sal lei tot ons tuiskoms in gemeenskap met God en die herstel van alle dinge. Dit sal so wees vir almal wat aanhou en sê: “Ek glo!!!”
Jesus Christus kom terug as Regter oor die lewendes en die dooies:
- Wat dit vir die regverdiges beteken
- Wat dit vir die goddeloses beteken
- Wat dit vir die skepping beteken
’n Troos vir die regverdiges
Ons bely: “Hy sal Homself as Regter oor die lewendes en dooies aankondig, terwyl Hy hierdie ou wêreld aan vuur en vlam sal prysgee om dit te suiwer. Dan sal ... alle mense, mans, vrouens en kinders, wat van die begin van die wêreld af tot die einde toe geleef het, persoonlik voor hierdie groot Regter verskyn.” Geliefde gemeente, Jesus Christus – jou Verlosser – sal jou Regter wees! Sal jy in Hom gevind word? Individueel sal jy voor Hom verskyn soos Hy is – in al sy heerlike majesteit terwyl hy op die oordeelstroon van die heelal sit.
Jesus weet alles. Dit is ’n wonderlike troos vir diegene wat in die lig van sy waarheid lewe. Die Christen hoef nie bang te wees nie, want sy lewe lê reeds oop voor die Regter. Ons bring dit alles na die troonkamer van God en vind vergifnis in Christus, by die kruis! Die sonde is weg! As jy in vrees vir die wederkoms leef, het ek twee vrae vir jou: 1) Is daar sonde in jou lewe wat jy wegsteek en nie bely nie? Leef jy as ’n huigelaar? Dan moet jy bang wees. Indien nie, dan wil ek jou nog ’n vraag vra: 2) As jy bely het, verstaan jy wat Jesus aan die kruis vir jou gedoen het? Jou sondes is saam met Hom begrawe. Jy sal geoordeel word op grond van die vrug wat jy in Christus gedra het. In sy wederkoms sal ons uiteindelik vry wees van hierdie liggaam van die dood! Dit is ’n ryke troos vir die sondaar.
Dit is ook ’n ryke troos vir die onderdruktes. Hierdie beeld van die wederkoms van Christus help ons om lyding, verdrukking en vervolging goed te verduur. God sal elke korrupte politikus tot verantwoording roep. Elke persoon wat die kerk van God vervolg het. Die onreg, die moorde, die slawehandel, die volksmoord, die misdaad, die vervolging, die mishandeling! Luister na die Woord van ons God: “aangesien dit reg is by God om aan die wat julle verdruk, verdrukking te vergelde, en aan julle wat verdruk word, verligting te gee saam met ons ... wanneer Hy kom om verheerlik te word in sy heiliges en bewonder te word in almal wat glo, in daardie dag; want ons getuienis het by julle geloof gevind.” (2 Thess. 1:6,7,10). In die lig van hierdie woorde vra ek aan julle almal ’n eenvoudige vraag: Hoeveel maak alles wat julle vandag nastreef, regtig saak? Verander dit nie alles wanneer julle die evangelie van Jesus Christus ken en glo nie?
Jy sal Christus sien soos Hy is. NOU! Nie soos Hy was toe Hy op aarde gewandel het nie, maar soos Hy nou is. In sy aardse lewe was sy heerlikheid versluier. Maar wanneer Hy kom, sal dit nie so wees nie. Hy sal ontsagwekkend en indrukwekkend wees in majesteit en heerlikheid! Waarlik, wanneer jy Hom die eerste keer sien, mag jy dalk neerval – net soos Johannes in Openbaring 1 gedoen het! Maar Hy sal sy hand uitsteek en sê: “Moenie vrees nie!”
Mag jy na daardie dag toe leef. Gee jouself en alles wat jy het vir die werk van die Here. Hou niks terug nie, geliefdes. Moenie enige deel van jou lewe of lewensbestaan terughou nie. Daar is een einde en een doel van die hele geskiedenis – en dit is die heerlikheid van Jesus Christus, ons Here – en dat sy kerk in Hom verheerlik kan word.
Daarom, gemeente, wees standvastig in die geloof. Geduldig in ellende. Oorvloedig van liefde en getrouheid! Moenie moeg word om goed te doen nie. Die doel van jou verlossing – Jesus Christus – wag! Hy is nie net die Outeur nie, maar die Voleinder. Nie net die begin nie, maar ook die einde van jou geloof! O, wat ’n vreugde en verligting sal dit wees vir die liggaam van Christus – die kerk – wat geleef het soos een wat agtervolg, gehaat, vervolg is. Verdra die lyding, verwerping en minagting. Dit is inderdaad hierdie lyding wat in ons ’n onvergelykbare ewige heerlikheid bewerk.
En vandag mag ons saam met die kerk van alle eeue roep: “KOM!” Ons is een met ons vervolgde broer Guido de Bres, en een met die vervolgde Christene in die Midde-Ooste. Ons is een. Ons is een met Abraham wat alles agtergelaat het. Ons is een met Moses wat “verkies het om liewer sleg behandel te word saam met die volk van God as om ’n tyd lank die genot van die sonde te hê!” (Hebr. 11:25). Die bruid van Christus word deur hierdie wêreld gehaat, net soos wat hulle haar Man gehaat het! Maar hierdie is “ ’n teken van die regverdige oordeel van God, dat julle die koninkryk van God waardig geag mag word, waarvoor julle ook ly.” (2 Thess. 1:5)
Eendag sal al die uitverkorenes geregverdig word. Dit is geskryf tydens ’n tyd van intense vervolging. Toe diegene wat nie deel van die Katolieke Kerk was nie, as ketters geoordeel is. Maar Guido de Bres weet dat alhoewel die “saak van die getroues en uitverkorenes tans deur baie regters en burgerlike owerhede as ketters en boos veroordeel word”, dit nogtans “eendag erken sal word as die saak van die Seun van God.” Pragtig. In ’n tyd waarin Christene as dwepers en haters beskou word. In ’n tyd waarin die sonde verhef word en die geregtigheid dikwels vertrap word. In ’n tyd waarin Christene gesien word as die ketters van die nuwe seksuele revolusie, en aan die verkeerde kant van die geskiedenis staan, weet ons dat alles eendag duidelik sigbaar sal word.
'n Verskrikking vir die goddeloses
Nie net sal hierdie dag ’n vreugde en troos wees en lei tot heerlikheid vir die uitverkorenes nie. Dit sal ook ’n dag van verskrikking, ewige lyding en volslae vernedering wees vir diegene wat God nie ken nie en die evangelie van ons Here Jesus nie gehoorsaam nie.
Alles sal ontbloot word – al die geheime en skynheiligheid van mense. As jy hier is en jy weet dat jy ’n huigelaar is, is dit nou ’n goeie geleentheid om jou geloof in Christus te stel. Moenie dink dat ’n lewe van skynheiligheid nie ontbloot sal word nie. Moenie dink dat dit nie so ’n groot probleem is nie. Ek smeek jou: Moenie wag nie! Bely nou alles. Vind nou vergifnis in Jesus en sy bloed! Sy genade is genoeg! Die boeke sal geopen word en almal sal geoordeel word volgens wat ons in die wêreld gedoen het. Sal dit jou werk wees, of Christus se werk in jou? Jy wil nie ’n kans waag met jou eiegeregtigheid en jou goeie dade voor mense nie. Daar is net een ding wat aanvaar kan word. En dit is Jesus se geregtigheid.
Vir diegene wat hulle nie aan die evangelie onderwerp het nie, sê die Bybel dat hy geopenbaar sal word, “met sy magtige engele in vuur en vlam, wanneer Hy wraak uitoefen op die wat God nie ken nie en op die wat aan die evangelie van onse Here Jesus nie gehoorsaam is nie. Hulle sal as straf ondergaan 'n ewige verderf, weg van die aangesig van die Here en van die heerlikheid van sy sterkte.” (2 Thess. 1:8-9). Sjoe!
En het jy mooi geluister? Dit is vir diegene wat “aan die evangelie van onse Here Jesus Christus nie gehoorsaam is nie”! Jy kan nie Jesus as Verlosser hê en nie begeer om jou in alles aan Hom as Here van jou lewe te onderwerp nie.
Ons lees in die belydenis dat hulle geoordeel sal word volgens dit wat hulle gedoen het. Dit is aan jou vrugte dat jy geken sal word. Die grootste werk is om te glo in die Een wat God gestuur het en om in Hom te bly. Maar die wat in Jesus bly, dra vrugte. Hierdie idee dat ons beoordeel sal word volgens dit wat ons gedoen het, word deur die Skrif nagespreek. Ons lees in Matthéüs 7: “Elke boom wat nie goeie vrugte dra nie, word uitgekap en in die vuur gegooi. So sal julle hulle dan aan hul vrugte ken. Nie elkeen wat vir My sê: Here, Here! sal ingaan in die koninkryk van die hemele nie, maar hy wat die wil doen van my Vader wat in die hemele is.”
En ons sien dieselfde gedagte terugkeer in Matthéüs 25 waar Jesus Homself as die Regter voorstel. Ons lees: “EN wanneer die Seun van die mens in sy heerlikheid kom en al die heilige engele saam met Hom, dan sal Hy op sy heerlike troon sit; en voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei; en Hy sal die skape aan sy regterhand en die bokke aan sy linkerhand sit.” Weet jy wat is die verskil tussen dié aan die regter- en dié aan die linkerkant? Dit gaan oor liefdesdade. Hy sluit die gelykenis as volg af: “Voorwaar Ek sê vir julle, vir sover julle dit nie gedoen het aan een van hierdie geringstes nie, het julle dit aan My ook nie gedoen nie. En hulle sal weggaan in die ewige straf, maar die regverdiges in die ewige lewe.”
Geliefde gemeente, vir diegene buite Christus is dit ’n skrikwekkende gedagte. Dit behoort vreesaanjaend te wees vir diegene wat nie werklik in Christus geglo het nie. As jy nie in Christus is nie, dra jy die sonde rond so swaar soos ’n stuk lood. Skynheiligheid is dwaas. Dit probeer mense behaag wat maar vir ’n kort asemteug lewe, eerder as om skuiling in die ewige God te vind. Dis soos om elke jaar die buitekant van die doodskis te politoer, terwyl die binnekant vrot.
Ja, vir hierdie mense, sê die belydenis, “is die gedagte aan hierdie oordeel ... ontsettend en skrikwekkend.” Dus, as jou hart jou oortuig, luister daarna! Moenie dit stilmaak nie. Moenie afgelei word nie. Neem hierdie oomblik in aanbidding en lê jou lewe voor jou Verlosser neer! Hy sal vergewe. Hy sal verlos. Hy sal liefhê. Maar as jy jou nie bekeer nie, sal dit jou gewete wees wat op daardie dag teen jou getuig. Ons bely: “Die goddeloses sal deur die getuienis van hulle eie gewete tot erkenning van hulle skuld gebring word.”
Dit is ’n oproep tot bekering! Soos Paulus sê: “Maak dood dan julle lede wat op die aarde is, naamlik hoerery, onreinheid, hartstog, slegte begeertes en gierigheid, wat afgodediens is, waardeur die toorn van God oor die kinders van die ongehoorsaamheid kom.” (Kol. 3:5-6) Waardeur die toorn van God oor die kinders van die ongehoorsaamheid kom!
Hy gaan voort en sê: “Maar nou moet julle ook dit alles aflê, naamlik toorn, woede, boosheid, laster, skandelike taal uit julle mond. Lieg nie vir mekaar nie, omdat julle die oue mens met sy werke afgelê het en julle jul met die nuwe mens beklee het wat vernuwe word tot kennis na die beeld van sy Skepper.” (vs. 8-10)
Ja, ons kan saam met Dawid bid: “Deurgrond my, o God, en ken my hart; toets my en ken my gedagtes; en kyk of daar by my 'n weg is van smart, en lei my op die ewige weg!” (Ps. 139:23-24)
Wat dit vir die skepping beteken
Dit is mooi hoe Artikel 37 die sigbare liggaamlike wederkoms van Jesus Christus beklemtoon. “Ons Here Jesus Christus sal met groot heerlikheid en majesteit uit die hemel kom, liggaamlik en sigbaar, soos Hy opgevaar het.” Dit beteken daar sal geen wegraping wees nie. ’n Geheime koms van die Here, wat niemand sal sien nie. Nee, alle oë sal Hom sien. Daar sal een finale definitiewe einde wees wanneer die opstanding en die lewe in heerlikheid verskyn! En diegene wat geweier het om met die oë van geloof te kyk, sal Hom sien. En diegene wat Hom gesien het, sal Hom uiteindelik aanskou soos Hy is. Nou kyk ons soos in ’n spieël, maar dan sal ons van aangesig tot aangesig sien. Nou ken ons ten dele, dan sal ons ten volle ken, net soos wat ons ten volle geken is. (1 Kor. 13:12)
Ons liggame sal soos Syne gemaak word. Christus is die eersteling! Hy is die begin van ’n nuwe skepping. Die ou skepping sal gereinig word van al sy sonde, boosheid en goddeloosheid, en daar sal ’n tuiste van geregtigheid wees.
Die Christelike hoop is nie gerig op die vernietiging van die aarde nie, maar die herstel van die hele skepping tot diens van die Here. Ons hemelse hoop is dat die Here dinge regstel, en dat die hemel en aarde verenig sal word. Ons lewens moet nou in verwagting wees van die nuwe skepping wat kom – daar waar ons saam met Koning Jesus in die hernude skepping sal regeer. Die hemelse hoop behels ’n materiële, beliggaamde herstel. Hemel en aarde sal saamkom soos wat Christus se Koningskap deur die hele skepping erken sal word. Hoe sal dit wees? Ek weet nie. Die Bybel gee nie verdere besonderhede nie. Maar ons weet dit sal beter wees as die beste wat jy jou kan voorstel – en dit sal vir altyd wees.
Die Koningskap van Christus sal vir ewig duur. In daardie ewige heerskappy sal sy kerk deel hê aan sy triomf en sy heerlikheid. Ons moet verstaan dat die missie van die kerk nie ’n tydelike saak is nie. Dit is ’n missie van die eeue en tot die eeue en vir die eeue. Die kerk moet verstaan dat haar missie een is wat ewigheidswaarde het. Nie net geestelik nie, maar materieel. Dit is nie verniet dat die skepping selfs nou sug dat die seuns van God geopenbaar word nie. Hoor jy dit? Dit roep uit soos in die pyne van geboorte. Wat gebeur ná die ergste pyne van die bevalling? Nuwe lewe! Dit is waarna die skepping uitsien. Nuwe lewe. Die volheid van die lewe!
Dit is ’n missie wat nooit as van sekondêre belang beskou kan word nie.
Ter afsluiting wil ek die bekende woorde lees wat ons aan die begin van hierdie diens ontvang het: “Genade vir julle en vrede van Hom wat is en wat was en wat kom, en van die sewe Geeste wat voor sy troon is, en van Jesus Christus, die getroue getuie, die eersgeborene uit die dode en die Owerste oor die konings van die aarde!” En wat word direk daarna gesê? “Kyk (of let op!), Hy kom met die wolke, en elke oog sal Hom sien, ook hulle wat Hom deursteek het; en al die geslagte van die aarde sal oor Hom rou bedryf.” (Openb. 1)
Hy KOM op die wolke. Met ander woorde, Hy is op pad. En wie is Hy wat kom? Die getroue getuie! Die Een wat getrou gebly het tot die einde toe! Wat staan as die opgestane Getuie van die evangelie en alles wat dit behels! In dae wanneer jou getuie getoets word – Jesus is die getroue Getuie. Die eersgeborene uit die dode. Die eersgeborene het gesag en gaan voorop in alle dinge. Die Eersgeborene het ook ander wat Hom volg. Hy het die dood oorwin. Wat kan ons vrees? Die Owerste oor die konings van die aarde! Uiteindelik sal sy wil oppermagtig wees. Hy is die absolute Monarg van hemel en aarde. En as ons Koning is Hy gewillig en in staat om ons in die stryd te ondersteun.
“Aan Hom wat ons liefgehad het en ons van ons sondes gewas het in sy bloed”. Hy het ons lief! Hy het ons van ons sondes bevry. Ons is bevry van die grootste onderdrukker van almal. Die sonde. Die eintlike probleem is sonde. Dit is die grootste onderdrukker van almal. En Christus het al sy geliefdes van daardie slawerny bevry!
“Dood, waar is jou angel? Doderyk, waar is jou oorwinning? Die angel van die dood is die sonde, en die krag van die sonde is die wet. Maar God sy dank, wat ons die oorwinning gee deur onse Here Jesus Christus.” (1 Kor. 15:55-56) Kom ons verkondig dit! Kom ons deel dit! Die mag van die sonde is gebreek! Die dood is oorwin!
Uiteindelik bring die wederkoms van die Here Jesus Christus hoop en vreugde vir die gelowige. Dit was in die Middeleeue waar die kerk die mense deur vrees regeer het. Dat hulle nie goed genoeg was nie! Die doel van hierdie artikel is nie om jou bang te maak dat jy nie goed genoeg sal wees nie. Glo my, op jou eie is jy nie gereed nie. Jy is nie. Die vraag is: “Is Christus voldoende? Vandag?” En die antwoord is ’n absolute JA!!! Die prag van die evangelie is dat daar geen veroordeling is vir diegene wat in Christus Jesus is nie. O, wat ’n vreugde wag daar op julle, geliefdes! Moenie nog ’n dag langer wag nie! Gaan dus na Hom toe. Lê jou lewe voor Hom oop en gee jouself aan Hom. Jesus, ons Koning, kom weer. Kom, Here Jesus!
Amen.